Gorkhaland state nawrnaah mi pathum thi

Gorkha Janmukti Morcha (GJM)-te’n West Bengal aṭanga Gorkhanland state hran pek phuta Darjeeling-a nawrh an huaihawtnaah buaina chhuak thar lehin, nawrh huaihawt zinga mi pathum an thi.

West Bengal Chief Minister Mamata Barnerjee-i chuan GJM chu tharum thawhna leh buaina thlen zawnga che lo tur leh, boruak ṭha tak hnuaia inbiakna neihpuiah a sawm. CM chuan nawrh huaihawtte hi inbiakna neihpui a inpeih reng tih a sawi a, mahse tharum thawhna an thlen ṭhin chu an titawp phawt a ngai a ni, a ti.

GJM chuan CM sawmna chu an pawm lo tih an sawi a, state sorkar chu inbiakna neihpui an tum lo tih an sawi. GJM hruaitu Binay Tamang chuan, “Mamata Banerjee hi inbiakna kan neihpui dawn lo a, CM leh state sorkar tan hun khar a ni tawh. Sorkar laipuiin Gorkhaland state din chungchanga inbiakna neih a rawt chuan kan tel ang”, tiin a sawi.

Kar kalta Zirtawpni khan khan GJM leh security force-te inkara buaina chhuak avangin GJM worker pakhat a thi a, hei vang hian mipui thinrim chuan a ruang hi pawnah la chhuakin sorkar hmun pawimawhte an suasam zui a ni. Nawrh huaihawtte hian police outpost halin, Sonada-a toy train station an hal zui bawk a, he hmun hi UNESCO world heritage site-a puan zingah a tel a ni. Darjeeling-a Deputy Police Superintendent town office beih a ni a, Kalimpong district-aNeora Forest Office pawh hal a ni bawk.