Delhi CM-in free surgery scheme a hawng

Delhi Chief Minsiter Ar­vind Kejriwal-a chuan Delhi khaw­puia private hospital-a free surgery scheme kalpuina tur a hawng.

Kejriwal-a kaihhruai AAP sorkar chuan free surgery scheme kalpuina tur hian Delhi, Gurugram, Faridabad leh Noida-ah private hospital 48 a thlang a, heng hmunah hian sorkar hospital 24-te’n an refer chuan inenkawlna hi a thlawn vekin an dawng thei dawn a ni. Sorkarin life-saving surgery a thlanchhuah zingah hian kidney, prostate, thyroid-te pawh a tel.

Scheme hawnaa thu a sawiah, Kejriwal-a chuan, “Dam­loten sorkar damdawi-ina inzai tura thla khat aia tam an nghah a ngai dawn a nih chuan, hospital chuan private hospital-ah a lo refer ang a, an inzaina senso hi sorkarin a tumsak dawn a ni. Mipuite chuan damdawi leh zirna lama enkawlna ṭha ber an dawn kan duh a, hei hi kan hmalakna pakhat a ni”, a ti.

Free surgery scheme dawng thei tur hian income proof neih kher a ngai lo a, mahse Delhi khawpuia cheng ngei an ni tih finfiahna erawh a ngai thung ang. Damlo hian a thlawna inzai tur hian sorkarin private hospital a thlan bik aṭang hian a duh a thlang thei dawn bawk a ni.

Kerjiwal-a chuan a kaih­hruai sorkar chu state sorkar zinga budget hmun li-a ṭhena hmun khat education sector atana dahtu leh, health sector atana 14-18 % dah hmasa ber a nih thu a sawi. Deputy Chief Minister leh Finance Minister Manish Sisodia chuan a ministry chuan free surgery scheme kalpuina turah sum lama harsatna a awm lohna turin theihtawp a chhuah dawn tih a sawi bawk.