India Covid-19 dinhmun: Maharashtra-ah nuai 3 chuangin hri kai tawh

India ramah hripui lengin ziaawm lam a la pan thei lo a, nimina Ministry of Health and Family Welfare report tihchhuahah chuan darkar 24 chhungin hri kai hmuh chhuah thar 38,902 lai an awm leh a, ni khata hri kai hmuh chhuah tam ber ni thleng lehin ni khata hmuh chhuah thar zat hian sing li a hlat tawh lo hle.

Ramchhung hmun hrang hrangah Covid-19 kai 10,77,618 an awm tawh a, heng zinga 6,77,423 chu enkawl dam an nih tawh laiin 3,73,379 laiin an la kai mek a ni. Darkar 24 chhungin dama puan 23,672 an awm leh a, enkawl dam tawh rate pawh pung ve hret hret zelin 62.86% a tling tawh. Mi 543 chuan an thihpui leh tih report-ah chuan tarlang bawkin, India ramah Covid-19 vanga thi 26,816 an awm tawh.

July 2 aṭang khan ram chhungah hri kai hmuh chhuah thar hi nitin 20,000 an chuang zel tawh a ni. Ni thum liamta chhung leka hri kai hmuh chhuah thar hi nuai khat an chuang. Hri kai hmuh chhuah zat 1,000 an nih aṭanga ni 51 chhungin mi nuai khatah an pung hman a, nuai khat hmuh tlin an nih aṭang hian ni 59 chhungin maktaduai khatah an pung chho leh hman a ni. 

Public Health Foundation of India president Prof K Srinath Reddy chuan hri leng darh zel tur kawnga sorkarin awmze neia hma a lak a, mipuite theihtawpa an inven chuan September thla laihawl velah aṭang ziaawm lam a pan chhoh theih a beiseiawm tih a sawi. Mitinten mahni mawhphurhna hria a, an fimkhur chuan thla hnih chhungin boruak a ṭhat chhoh a beisei thu a sawi a, hemi ruah hian mipuite leh sorkar hmalaknaah a innghat dawn a ni, a ti 

India rama hri lengin a nghawng nasat ber state Maharashtra-ah chuan nimin khan hri kai hmuh chhuah thar 8,348 lai an awm leh a, hei nen hian hri kai hmuh chhuah 3,00,937 an awm tawh. Heng zinga 1,65,663 chu enkawl dam an ni tawh a, 1,23,678-in an la kai mek a ni. Darkar 24 chhungin mi 144-in an thihpui leh a, Maha-ah ringawt hian hripui vanga thi 11,596 an awm tling tawh.

Tamil Nadu-ah pawh hri kai 1,65,714 an awm tawh a, heng zinga 1,13,856 lai chu enkawl dam tawh an nih laiin 49,455 chuan an la kai thung. Mi 2,403 an thi tawh bawk. India ram khawpui Delhi-ah chuan hri kai     1,21,582 an awm tawh a, 1,01,274  lai enkawl dam an ni tawh a, 16,711 chuan an la kai mek thung. Tamil Nadu aiin thihpui an tam tawh zawk a, 3,597-in an thihpui tawh a ni. Ladakh, Delhi, Haryana, Rajasthan leh Andaman Nicobar Islands-te chu state leh UT zinga recovery rate sang zual panga an ni a, recovery rate 73% aia sang an nei. National average aia recovery rate sang state leh UT 18 lai a awm bawk.