AIIMS-ah mihringa Covid-19 vaccine enchhinna nei dawn

All India Institute of Medical Sciences (AIIMS), Delhi-a Ethics Committee chuan kar liam ta Inrinni khan an damdawi-inah COVID-19 vaccine Covaxin chu mihringa enchhinna, clinical trial neih an remti tih a tarlang.

Indian Council of Medical Research (ICMR) chuan Covaxin chu clinical trial phase I leh II neihna tur hmun a thlan 12 zingah AIIMS-Delhi hi a thlang tel a, phase I-ah hian volunteer 375-a trial neih tum a ni a, heng zinga volunteer 100 chu AIIMS aṭanga volunteer-te an ni ang.

Volunteer-te hi Covid-19 la kai miah lo leh natna nei lo an ni a, kum 18 aṭanga kum 55 inkar an ni tih AIIMS-a Centre for Community Medicine professor Dr Sanjay Rai chuan a sawi a, "Volunteer tur ṭhenkhatte chu Covid-19 vaccine trial nei turin an in register tawh a, an taksaa vaccine kan chiu luh hma hian screening kan neih pui leh vek ang," tiin Dr Sanjay Rai chuan a sawi.

Vawin aṭangin trial hi neih tum a ni a, volunteer duhte chu Ctaiims.covid19@gmail.com ah emaw 7428847499-ah hian SMS emaw call-in a hrilh theih a, AIIMS chuan an website-ah volunteer-te cnntact detail an tarlang bawk ang.

COVID-19 vaccine, mihringa enchinna neih tum hi Covaxin tih a ni a, Hyderabad-a Bharat Biotech International Limited (BBIL) siam chhuah a ni a, anni hian ICMR leh National Institute of Virology (NIV) an thawhpui bawk a ni. 

Tun thla tir khan Drug Controller General of India (DGGI) chuan Covid-19 vaccine hi mihringa endik phalna a pe a, tun thla chhungin clinical trial Phase 1 leh II hi neih tum a ni.