Kum 25-ah developed country nih kan tum ; Eirute hrem turin kan thawhho a ngai - Prime Minister

India Independence Day vawi 76-na chu nimin khan ram pumah lawm a ni. A lawmna pui ber, New Delhi-a Red Fort-ah prime minister Narendra Modi chuan hnam puanzar a pawt pharh.

Red Fort-ah hian venhimna khauh taka kalpui niin, venhim hna thawk tur hian mi 10,000 chuang dah an ni. Entry point-ah facial recognition system dah niin, kuminah hian sawmbik mi 7,000 vel an tel.

Prime Minister Modi chuan India-in zalenna a hmuh theihna atana beitu leh nunna hlantute chungah lawmthu a sawi. Hemi rual hian zalenna sualtuten duhthusam chu India zalenna champha kum 100-na, kum 2047-ah tihpuitlin a nih theihna turin ram mipuite chu intiamna neia hma lam pan turin a chah. PM-in kum 2047 atana intiamna nei tura a tihte chu - India ram developed nation-a siam, inhnuaichhiahna awm ṭhin tihbo, ram thil neihte chhuan, inpumkhatna leh mawhphurhna tihpuitlin a ni.

Red Fort pan hmain PM Modi hian Raj Ghat a tlawh hmasa a, Mahatma Gandhi zahna a hlan a ni. Red Fort a thlen hnuah inter-service leh police Guard of Honour-te endik lehin, hnam puanzar a pawt pharh a ni.

India ramin zalenna a hmuh champha vawi 75-na lawmna atana sorkarin programme lian tak a buatsaih, Azadi ka Amrit Mahotsav chu nikum March thla aṭang khan kalpui ṭan a ni. He programme hnuaiah hian sorkar laipui chuan in tina hnam puanzar zarna tur, Har Ghar Tiranga campaign a nei bawk. A ṭum khatna atan kumin Independence Day lawmna pualin sorkar chuan chenna inah ni thum chhung national flag zar a phalsak.

PM Modi chuan India ram tichhetu ber chu hleih neihna, inthlah chhawng rorelna leh eirukna a ni tiin, hengte hi do a ṭul thu a sawi. Induhsakna, hleih neihna chu thil sual lian tak, ramin a do tlat tur a ni tiin, mithiam, ram hmasawnna atana thawktute chu duhsaka hun ṭha pek zawk tur an ni, a ti. Politics-a hleih neihna, inthlah chhawng rorelna ṭha lo tak awm chuan institution hrang hrangah pawh thil ṭha lo hi a thlen vek tawh a ni, a ti.

Eirukna chuan ram a tichhia a, do let a ngai tih Modi chuan a sawi bawk. India chuan eirukna bakah, a eirutu ngei chu a do let a ngai a ni tiin, "Eirute hrem an nih theihna turin khawtlang pawh kan thawhho a ngai a ni. Eirukna avanga ram danga tlanchhiate thil neihte pawh laksak zel tumin kan bei a, eirukna kan dona kawnga in vaia min do pui turin kan sawm cheu a ni," a ti. India ram rawktu chuan a thiltih man chu pek let tir ngei chu an tum tur a ni tiin PM chuan a sawi.

Kum 71 mi, Narendra Modi hian Independence Day lawmna puala Red Fort-a a zawna thu a sawi ṭum kuana a ni a, minute 83-a rei thu a sawi. Kum 2016 kha a thusawi rei ber ṭum niin, minute 94-a rei a sawi a ni. PM hian Red Fort-a hnam puanzar a pawh pharh hnuah, zing dar 7.30-ah thu a sawi ṭan. Modi hian kum danga turban rawng lar tak a khum ṭhin ang lo takin, niminah hian turban var, tricolour-a print a khum. Kurta leh pajama var, Nehru coat dumpawl nen a inthuam bawk.

Ramchhunga siam howitzer gun hmang
A vawi khatna atan nimin Independence Day lawmna puala 21 gun-salute neihah ram chhunga siam, howitzer gun-te chu hman an ni.

Defence research organisation, DRDO-in Advanced Towed Artillery Gun System (ATAGS) a siam hi Prime Minister Modi-a'n Make in India campaign a siamna hnuaia siam an ni. Firm pahnih - Bharat Forge leh Tata Advanced Systems Limited-ten an siam a ni. ATAGS hi Britain siam, 27-Pounders nen hman an ni.

Planet chung km 30-a sangah India flag zar
Independence Day lawmna pualin Space Kidz India chuan nimin khan planet chung, km 30 vela sangah India flag a zar.

Space Kidz India hian tun hnaiah Low Earth Orbit-ah sattelite a lo kapchhuak tawh a, he satellite hi ram chhung hmun hrang hrang aṭanga zirlai hmeichhia 750-ten an siam a ni. Mahse Small Satellite Launch Vehicle (SSLV) chuan he satellite hi orbit-ah a dah fuh lo a ni. Organisation hian satellite te zawk siam a tum leh mek.