Pakistan-in India palai a ko

Pakistan chuan Kashmir region-a Line of Control (LoC)-a India sipaiten dan kalhin silai an hmetpuak nia sawi chungchangah an rama India palai awm chu koin thil awmdan a sawipui.

Kar liam ta Zirtawpni khan India sipaite chuan LoC-a Rakhchikri leh Baroh sector-ah silai an hmetpuak tih Pakistan foreign ministry chuan a tarlang a, he thil thlengah hian hmeichhe pahnih an thi tih ministry chuan a tarlang bawk. Kumin chhungin India chuan inkahhai vawi 1,697 a bawhchhe tawh a, hei vang hian mi 14 an thih phah tawh thu leh mi 133-in hliam an tuar tawh tih ministry chuan a tarlang bawk a ni. 

Pakistan-in a puhna hi India chuan chhui chian a tum thu a sawi a, LoC-a inkahhai puan tawh chu an zah em em thu India chuan a tarlang a, muanna leh remna an duh ber tih India chuan a tarlang bawk. Kum 2003 khan Pakistan leh India chuan LoC-ah hian inkahhai an puang a, hemi hnu hian vawi tam tak ram pahnihte hian an bawhchhe tawh a, LoC-a inkahhai bawhchhe zawkah an inpuh tawn reng a ni.  

Nikum August 5 khan Jammu and Kashmir state tana special status pekna, Article 370 chu BJP kaihhruai National Democratic Alliance (NDA) chuan a titawp a, hei vang hian India leh Pakistan inkarah hian innghirnghona a nasat phah a ni.