Darjeeling-ah kawngzawh huaihawt

Gorkha Janmukti Morcha (GJM)-te’n Gorkhaland state hran phuta tiam chin awm loa nawrh an huaihawt chu nimin kha a ni 26-na a ni tawh a, nimin khan Darjeeling hmun hrang hrangah kawngzawh huaihawt a ni.

Pathianni zan aṭang khan tharum thawhna thleng thar a awm hriat a ni lo a, mahse hmun hrang hrangah venhimna khauh zawka kalpui a ni. Police station, camp leh outpost-te chu Gorkhaland thlawptuten an beih tur lakah vengin, venghimtu tam zawk dah an ni. Khawpui chhung kawtthlerahte police leh security force-te an duty reng bawk.

Nimina kawngzawhnaah hian political party hrang hrang aiawhte an tel a, kawngzawh zinga tam tak chuan an hnam thuam an inbel a ni.

Nawrh huaihawtnaa tharum thawhna thleng ṭhin avangin buaina punlun zel tur venna kawng khat atan June 18 aṭang khan Darjeeling-ah hian internet service tihtawp a ni. Hun rei tak nawrh huaihawt a nih tawh avangin ei leh bar lakkhawm kawngah mipuiten harsatna an tawk ṭan a, mahse GJM leh NGO pawl dangte chuan mipuite hnenah ei tur an sem ṭhin a ni. School, college leh dawrte khar vek a la ni a, damdawi dawr erawh chu hawn phalsak an ni thung.