Court-ah Vijay Mallya inlan lo

Leiba ngah avanga talbuai mek, sumdawng lian Vijay Mallya chu nimin khan Supreme Court-ah inlan tura tih ni mah se a inlan lo. Supreme Court chuan Mallya chungthu hi July 14-ah ngaihtuah turin a dah leh a ni.

State Bank of India kaihhruai bank hrang hrang intelkhawm te chuan loan ba, cheng vaibelchhe 9,000 chuang nei mek, Vijay Mallya hi India leh ram pawn lama a thil neih kimchang puangzar loah an puh a, hemi chungchangah hian Supreme court chuan May 9 khan Mallya chu court thupek zah lohah puhin July 10-ah court-a inlan turin a ko a ni.

Justice AK Goel leh UU Lalit awmna bench chuan Malay chungthu hi July 14-a ngaihtuah turin a ti a, he hunah hian Solicitor General pawh tel turin an ngen bawk. Court zahloa puh a nihnaah hian thiam loh chantir a nih chuan thla ruk lung-in tan emaw, cheng 2,000 emaw chawitir a hrem theih a ni ang. Vijay Mallya hi England-ah a awm mek a, sorkar laipui chuan Britain sorkar hnenah pawh India rama thawn turin a ngen tawh a ni.

SBI kaihhruai bank intelkhawm chuan Supreme Court-a Mallya leiba chungchang thlen a nih hnuaah, Mallya hian court thupek palzutin, British firm Diageo hnen aṭanga dollar maktaduai 40 a dawn chu a fate account-ah a transfer niin an sawi. Mallya hian court thupek zawm loin, an thil neih chungchang pawh kimchangin a puangzar duh lo niin an puh bawk.

March 9 khan Supreme Court chuan Mally hnenah hian amah leh a fate hminga a thil neih zat dik tak a puangzar em tih zawtin, a fate account-a pawisa a transfer nia sawi chungchang hi a zawtfiah a ni.