Bihar Dy CM ban tum lo

Bihar Deputy Chief Minister Tejashwi Yadav chu eiruknaa inhnam­hnawihah puhin Central Bureau of Investigation (CBI)-in a lakah thubuai ziaklut mah se, deputy chief minister a nihnaaṭangin a bang dawn lo niin a party, Rastriya Janata Dal (RJD) party chuan a sawi.

Tejashwi hi Lalu Pradad Yadav-a fapa a ni a, CBI hian Lalu leh a nupui Rabri Devi, a fapa Tejawshwi Yadav leh official dangte chu Lalu-a union railway minister a nih laia private firm hnena hotel maintenance contract a pek danah thil dik tawk lo a awm nia sawiin an laka thubuai a lo ziaklut tawh a ni.

Thubuai siamsak a nih hnuah Bihar-a eptu pawl, BJP chuan deputy CM hi bang turin an phut a, mahse RJD-in ṭangrual sorkar a siampu, Chief Minister Nitish Kumar-a party Janata Dal (United) pawhin Yadav-a thlavang hi hauhin, BJP-in an thawhhona tihchhiat an tumna chu a hlawhtling dawn lo niin an sawi.

RJD chuan an party MLA-te’n meeting an neihah, legislator-te chuan deputy CM hi bang lo turin an duh vek tih a sawi. Meeting-ah hian MLA-te chuan Tejashwi hnathawh te chu fakin, JD(U) nen an inkarah eng harsatna mah a awm loh thu an tarlang. Central-a BJP kaihhruai sorkarin Bihar sorkar tih­chhiat tum mah se, an nghing dawn lo tih an sawi bawk.