Firfiakten Amarnath Yatra hmangtute an bei

Jammu and Kashmir-a Amarnath Yatra hmanga kalte chu Thawhṭanni zan khan beih an ni a, mi pasarih an thi a, midang 19-in hliam an tuar.

Kumtinin Hindu mi tam tak chu Srinagar bula Batal-a an sakhaw hmun pawimawh, Amarnath Cave shrine tlawhin an kal ṭhin. Amarnath Yatra hi thla hmasa tawp lam aṭang khan inṭanin, August thla tawp thleng a awh ang. Shrine awmna hi Jammu aṭanga km 200 vela hla a ni. Thawhṭanni khan Amarnath Shrine tlawhtute chuanna bus pakhat chu firfiakten lo kapin an bei a ni.

Kashmir Police-te chuan pawikhawihna thlengah hian Pakis­tan firfiak pawl, Lashkar-e-Taiba an inrawlh niin an sawi a, a bultumtu ber chu Pakistan firfiak Abu Ismail niin an sawi. Biakzina kalte chuanna bus hi firfiakte hian Anantnag bula security check post bulah hmun pathum aṭanga lo hualin an lo bei a ni. Heng firfiakte hian a hmain polcie chuanna car pawh an lo kap tawh bawk.

Firfiakten an beih bus-ah hian Gujarat leh Maharashtra aṭanga kalte an chuang a, Amarnath shrine an tlawh zo an kir lam chu beih an ni ta a ni. Police-te chuan security lam venthawn thilah highway-ah hian biakzina kalte phurtu bus-te chu zan dar 7 hnu lamah tlan phalloh a ni tih an sawi a, mahse vanduaina tawkte phurtu bus hi a chhiat avangin a khawmuan phah ta niin an sawi. Hei bakah hian he bus hi official tour zingah a tel lo a, police-te an veng lo nia sawi a ni bawk.

Pawikhawihna thleng mah se Amarnath Cave tlawh tura kal hi an awm belh zel tho a, nimin zing pawh khan mi 3,000 vel chu A­marnath lam panin an chhuak a ni. Mahse thuneitute chuan biakzina kalte motor vengtu tur hi an dah belh a ni. Home Minister Rajnath Singh chuan Jammu and Kashmir security dinhmun ennawn turin meeting a ko nghal a ni. Amarnath Yatra neih chhunga venhim hna thawk tur hian sipai 40,000 vel tirh an ni ṭhin a, kumiah hian drone leh satellite tracking-te hman tel a ni. Home Ministry official-te chuan nimin khan J&K hi an tlawh nghal.

Kashmir senior police officer Munir Khan chuan pawikhawihna thleng hi LeT-te phuba lakna nia a lan thu a sawi. Pathianni kha security force-te chuan Kashmir Valley-a Lashkar unit hmuchhuakin an lo bei tawh a ni.

Party hrang hrang chuan biak­zina kalte beih leh thah an nih chu an dem thu an sawi a, he thil thleng duh lohna lantir hian Jammu-ah bandh huaihawt an tum. Prime Minister Narendra Modi chuan Kashmir-a firfiakte pawikhawihna thleng chu a dem thu sawiin, hetianga misual leh dawihzepte thiltihah hian India chu a zam dawn lo tih a sawi. PM chuan J&K chief minister Mehbooba Mufti-i pawh biain, sorkar laipui chuan a puih zel tur thu a hrilh a ni.