SC-in bawng talh khapna thupek a ‘stay’

Supreme Court chuan sorkar laipuiin talh tura bawng lei leh hralh khapna thupek a tihchhuah chu nimin khan a dansak.

May 23 khan sorkar laipui chuan thuchhuah siam­in, talh tura bawng lam chi hralh leh lei a khap bakah, sakhaw thila inhlanna atana bawng hman a khap a ni. He thupek hi Madrash High Court chuan an state bikah a lo dansak tawh a, nimin khan Supreme Court-a Chief Justice of India JS Khehar kaihhruai bench chuan Madras High Court-in a stay-na hi rampumah hman a ni ang, a ti.

Additional Solicitor General PS Narashima chaun court hnenah hian sorkar laipuiin rules a siam hi a ennawn mek a, August thla tawp lamah thupek thar a tichhuah leh dawn avangin thupek hran lo siam lo turin a ngen a, mahse a ngenna hi court chuan a hnawlsak. Court chuan sorkar laipui chuan a tihtur chu chhunzawmin thupek thar a siam pawh a tichhuak thei reng tih a sawi a, mahse hemi chhungah hian ram pumah bawng talh khapna thupek a lo tihchhuah tawh chu dansak rih a nih thu a sawi.