Kerala-in dog zoo siam dawn

Kerala-a Left Front sorkar chuan an state chhunga khawlai ui tam lutuk leh, heng ui kawlh tak takten harsatna an thlen ṭhinte tihziaawmna turin district 14-ah dog rehabilitation zoo siam a tum.

Dog zoo siam an tum thu hi state senior advocate V Giri chuan Supreme Court bench henah a hriattir a, zoo siamna atan hian district tina panchayat-te chu ram acre 2-3 a zau an neih a ngaih thu hrilh a ni, a ti. Khawlai ui enkawlna tura ram ruahmante hi uluk taka hung vek an ni ang, a ti. 

Hetih lai hian sorkar laipui, Animal Welfare Board leh NGO-te chuan dog zoo siam tum hi an duh lo a, khawlai ui pung chak tur thunun chu a tihdan ṭha zawk niin an sawi a, state sorkar chu Animal Birth Control (Dogs) Rules hmang zawk turin an duh a ni. Mahse state sorkar chuan central rules hi hman a tum lo a, dog zoo siam turin hian thuneihna a nei tih a sawi thung.