Modi hian ṭhian induhsakna 'Dostvaad' pawh a titawp ve ngam tur a ni - AAP

Prime minister Narendra Modi-a'n Thawhṭannia Independence Day lawmnaa thu a sawiah, India ram tichhetu ber chu chhungkaw inthlah chhawng rorelna, dynasty leh eirukna a ni tiin, hengte hi umbo a ngai nia a sawi chungchang chu Aam Aadmi Party (AAP) in a chhang let.

Nimin khan AAP hruaitu, Delhi deputy chief minister Manish Sisodia chuan PM thusawi hi chhangin, eirukna lak aṭanga India ram thenfai a nihna tur chuan dynasty chauh ni lo, ṭhian duhsakna, 'dostvaad' (favouring friends) pawh tihtawp tel a ngai a ni, a ti.

New Delhi-a press conference a neihah Sisodia chuan, "Modiji chuan dynastic system chungchang a sawichhuak a, mahse ṭhian duhsakna, dostvaad hian nasa takin ram a tichhe thei a ni. Dostvaad hian ram economy thlengin a tichhia a ni," tiin a sawi.

"Modi chuan eirukna tihtawp a duh thu a sawi, mahse hemi tipuitling tur chuan 'dostvaad' hi a kalsan a ngai," tiin PM thusawi chungchanga an ngaihdan an zawhnaah Sisodia hian a sawichhuak a ni.