Bus chesualah border police 6 an thi

Border police phurtu bus chu nimin khan Jammu and Kashmir-ah a chesual a, bus-a chuang zinga mi paruk an thi. Midang 30 chuan hliam an tuar bawk.

Bus hi Anantnag district-a Chandanwari-ah chesualin luiah a tla zui a ni. He bus-ah hian security force mi leh sa 41 an chuang. An zinga 39 chu Indo-Tibetan Border Police (ITBP) a ni a, Jammu and Kashmir police pahnih an tel bawk. Security force-te hi Amarnath Yatra-a an duty zo, Chandanwari aṭanga Pahalgam an panna kawngah a chesual a ni.

Motor chesuala thite ruang hi Pahalgam Civil Hospital-ah lak an ni a, hliam tuarte hi first aid pek an nih hnuah GMC Anantnag lamah thawn an ni.

President Droupadi Murmu leh union home minister Amit Shah-te chuan chetsualna thleng chu pawi an tih thu leh, nunna chan chhungte an tuarpui thu an sawi a, hliam tuarte an dam leh thuai an duhsakna an hlan bawk.