J&K-ah firfiakten Kashmiri Pandit kaphlum

Jammu and Kashmir-a Shopian district-ah nimin khan firfiakten apple huana Kashmiri Pandit-te hnathawk lai an kap a, mi pakhat a thi.

Firfiakten an kahhlum hi Sunil Kumar a ni a, a unaupa Pintu Kumar pawhin hliam a tuar a, damdawi-inah hruai nghal a ni. Police-te chuan pawikhawihna thlenna hmun kalpawh theih lohin an khar nghal a, sipai tirh luh belhin firfiakte man tum hian beihpui thlak nghal a nih thu an sawi.

J&K lieutenant governor Manoj Sinha chuan pawikhawihtute hi man chhuah ngei an ni dawn tih sawiin, Shopian-a civil mite beihna thleng chuan a rirlu a ti na takzet tih a sawi bawk.

Chief minister hlui pahnih, Mehbooba Mufti leh Omar Abdullah-te pawhin Shopian-a firfiakte pawikhawihna thlen chu an dem thu sawiin, thi chhungte an tuarpui thu an sawi.

Nikum October thla aṭang khan Kashmir-ah firfiakten pawikhawihna an thlen fo a, a tuartu tam zawk chu migrant worker, Kashmiri Pandit-te an ni. Nikum October thla khan ni nga chhungin civil mi pasarih thah an ni a, an zingah hian Kashmiri Pandit, Sikh leh Hindu pahnih an tel. Heng thil thleng hian Kashmir Valley-a awm Kashmiri Pandit tam tak chuan an tan a him lo nia sawiin, an in hi an tlanchhuahsan tawh a ni.

Kumin May thla khan Budgam-a Tehsildar office-a thawk, Kashmiri Pandit Rahul Bhat chu office chhungah kahhlum a ni leh bawk.