Amarnath Yatra chawlhsan a ni dawn lo

Sorkar laipui chuan Jammu and Kashmir-a Amarnath Yatra hmanga kalte chu beih ni mah se, yatra hi chhunzawm zel a ni dawn tih a sawi.

Minister of State for PMO Jitendra Singh leh Minister of State for Home Hansraj Ahir-te chuan nimin khan Srinagar-a Amarnath Yatra hmanga kalte camp an tlawh a, firfiakten yatra hmanga kalte an bei chu an dem thu an sawi.

Thawhṭanni khan Amarnath Shrine tlawhtute chuanna bus pakhat chu Anantnag-ah firfiakten lo kapin, mi pasarih an thi a, mi dang 19-in hliam an tuar a ni. He pawikhawina thlentute hi Pakistan firfiak pawl, Lashkar-e-Taiba (LeT)-te nia hriat a ni.

Sipai hotu General Bipin Rawat chuan Kashmir Valley-a pawisawi lo, biakzina kal beitute chu security force-te’n an manchhuak ngei dawn tih a sawi. General Rawat hian Thawhlehni khan Srinagar a tlawh a, J&K-a security dinhmun a ennawn a ni. Sipai hotu hian J&K governor NN Vohra leh Chief Minister Mehbooba Mufti-i te a kawm a, officer leh state secretary BB Vyas leh director general of police SP Vaid-te meeting a neihpui bawk.

Amarnath Yatra hmang­a kal hi kumtin mi nuai 2.5 chuang an awm ṭhin a, venhim hna hi central armed police forces (CAPF)-te’n thawkin company 300 vel dah an ni ṭhin a, anni bakah hian kumin atan bik Army chuan sipai 5,000 vel an dah belh bawk a ni.

Thawhṭanni-a biakzina kalte beihnaah hian Pakis­tan firfiak pawl, Lashkar-e-Taiba commander Abu Simali chu a bultumtu berah ngaih a ni. Security force-te chuan Abu Ismail hi man ngei tumin Kashmir chhim lamah beihpui an thlak nghal a ni. Islami hi Pakistan mi a ni a, mahse kum eng emaw chen chu Kashmir-ah hian chet lain, kum khat liamtaah khan Kashmir chhim lamah a pem nia sawi a ni.

Hetih lai hian LeT chuan Anantnag-a pawi­khawihna thlentu an nih loh thu a sawi. Las­khar thupuangtu Abdullah Ghaznavi chuan biakzina kalte beih chu Islam zirtirna kalh a ni tih sawiin, he pawi­kahwihna thlengah hian an inhnamhnawih lo a, thil sual titute chu an dem hle tih a sawi a ni.