Sasikala-i’n jail official-te thamna Rs vbch 2 pe

Bengaluru Central Jail-a tang mek, AIADMK general secretary VK Sasikala-i chuan VIP treatment a dawn theih nan jail official-te hnenah thamna, cheng vaibelchhe hnih a pe nia sawi a ni.

Deputy Inspector of Prisons (DIG) Roopa Moudgil-i’n state sorkar hnena report a thehluhah hemi chungchang hi tarlan a ni a, hei hi local news channel ten an sawi­chhuak a ni. Sasikala-i hian Director General of Prisons (DGP) Satyanarayana Rao hnenah cheng vaibelchhe khat pein, cheng vaibelchhe khat dang chu cental jail official-te sem an ni a, an zingah hian warden pawh a tel. Sasikala-i hi a sum lakluh phu loa hausa-a puhna, eiruk thubuaiah thiam loh changin kum li tang tura hrem a ni.

DIG Roopa-i report chuan kum 59 mi Sasikala-i hi February 15 aṭanga a tanna, jail-a women cell-ah hian lal ang maia enkawl a ni tih a sawi. AIADMK hotu hian nitin a bika siam ei tur a dawng a, heng hi women cell bula special kitchen-ah ei siamtu hranpa ruatin a siamsak ṭhin a ni.

Sasikala-i bakah stamppaper scam avanga thiam loh chantir, Bengaluru central jail-a tang mek Abul Karim Telgi pawhin duhsakna a dawng niin Roopa-i report chuan a tarlang bawk a, Abdul Telgi hi massage tur­in tang zinga 3-4 ruat ṭhin an nih thu a sawi.

Hetih lai hian thamna dawng zinga puh, DGP Satyanarayana Rao chuan an puhna chu thu dik lo niin a sawi a, Roopa-i hnenah pawh sawifiah tur leh, a puhna finfiahnate pe tura a hriattir thu a sawi. Roopa-i hian a hnenah emaw, sorkar leh jail official te hnenah emaw eng report pawh a pek loh thu Rao chuan a sawi. Roopa-i’n an department hi kar thum chhung chauh a la zawm hman a, hemi chhung leka hetiang thil tam tak a hmuchhuak chu thil awihawm loh tak a nih thu a sawi bawk.

Roopa-i report-ah hian jail-a tangte zing­ah hian ruihhlo pawh kawng hrang hrang hmanga pek an nih thu a sawi a, tang zinga ṭhenkhat chu facility ṭha bik pek an ni bawk niin a tarlang. Tang zinga 25 test zinga 18 chuan ruihho an hmang ṭhin tih finfiah a ni a, hetianga thil dik lo tihnaah hian DGP aṭanga jail warden thlengin an inrawlh a ni, a ti.