UP Assembly-ah puak thei thil chhar

Uttar Pradesh Assembly House, Lucknow-ah white powder hmuh a ni a, he thil hi enfiah a nih hnuin puak thei thil a ni tih hriatchhuah a ni. He thil thleng vang hian Chief Miniter Yogi Adityanath chuan high level security meeting a ko nghal.

Nilaini khan assembly-a thuthleng pakhatah powder, gram 60 vel hi chhar a ni a, forensic-a endik tura thawn nghal a ni. Ningani zan khan forensic laboratory report tihchhuah a ni a, powder hi plastic explosive, PTEN (Pentaerythritol tetranitrate) a nih thu puan a ni.

Forensic report tihchhuah a nih hnu hian Chief Minister chuan House chhunga PTEN hmuh a nih chungchang hi National Investigaiton Agency (NIA)-te’n chhui chiang se a duh thu a sawi. MLA-te chu House chhungah mobile phone keng lut lo turin a hriattir bawk.

Eptu pawl, Samajwadi Party chuan he thil thleng hi rang taka chhui chian an phut thu an sawi. SP hruaitu Rajendra Chaudhary chuan, “Engtinge he powder hlauhawm tak hi Assembly-ah lakluh a nih theih enfiah thuai a ngai a ni. Vidhan Sabha pawh a him tawh lo a nih chuan, state chhung hmun dang himna pawh a derthawng dawn hle a ni”, a ti.

Congress hruaitu Ghulam Nabi Azad pawhin security chungchang hi sawichhuakin, sorkar hlawh­chhamna anga a ngaih thu a sawi. Eptu hruaitu ṭhutna hnuaia puak thei thil hmuh a ni hian, UP hmun dang dinhmun chu a ṭha tawh lo hle tih a tarlang a ni, tiin a sawi. PETN hi colourless cyrstal a ni a, bawm chhunga dahin hriat hran a har hle a, mahse metal detector hmangin awlsam taka hriatchhuah theih a ni. He powder hi a chak hle a, gram 100 vel pawhin car a bomb darh vek thei niin, expert-te chuan an sawi. Semtex bomb siamna atan pawh hman a ni bawk.