Darjeeling-ah CRPF company pali tirh belh
Sorkar laipui chuan Gorkhaland state hran phuta nawr huaihawt mekna, Darjeeling leh Kalimpong-ah dan leh thupek kahuh zawka kenkawh a nih theih nan CRPF company pali a tirh belh tih nimin khan Supreme Court a hrilh. Justice Dipak Misra kaihhruai judge pathum awmna bench hnenah sorkar chuan Darjeeling leh Kalimpong-ah hian a hmain CRPF company 11 tirh an lo ni tawh tih a sawi a, tualchhugn mite himna tur leh, dan leh thupek kenkawh a nih theih nan sipaite hi tirh belh leh an ni, a ti.
Gorkhaland state hran phuta nawrh huaihawttute chuan Nilaini zan khan Darjeeling district chhunga hmun hrang hrangah pawikhawihna thlen lehin, building eng emaw zat an hal leh. Darjeeling-a tourism centre chu halral vek a ni a, Dohtrey Salimbung Forest Range Office, Teesta Soil Conservation Rest Shed leh Gorkhland Territorial Administration (GTA) Tourism Information Centre-te hal an tum bawk a, mahse hei hi chu an dang hman a ni. Kalimpong-a Tamang Development Board chairman Sanjay Mukta in pawh hal an tum a, mahse an tihlawhtling hman lo.
Darjeeling-a bandh huaihawt chu Bhanu Jayanti pualin thladul ni mah se, dawrte chu khar vek an la ni. Thawhlehni-a all party meeting chuan Darjeeling hills-a state sorkarin development board 15 a dina chairman leh vice-chairman-te chu bang vek turin an phut. Board member tam zawk chuan banna an thehlut tawh a, mahse chairman leh vice-chairman-te erawh chu an la bang duh lo. State sorkar ruat an nih avangin ban mai an tum lo tih an sawi.