Kejriwal-a'n 'Make India No. 1' mission tlangzarh

Delhi chief minister leh Aam Aadmi Party (AAP) national convener, Arvind Kejriwal chuan nimin khan khawvel huapa India ram dinhmun sang bera a awm theihna atana hmalakna tur, 'Make India No.1' mission an siam chu a tlangzarh.

Make India No. 1 mission hnuaiah an hmalakna hmasa ber tur chu ram chhunga naupang tinte zirna an neih theihnan a ni tih sawiin, Kejriwal chuan a senso tur chu eng ang pawh ni se, naupang tinte lehkha zirtir phawt an ngai a ni, a ti. Mitinte a thlawna healthcare an dawnna turin hmun tam zawkah hospital leh Mohalla clinic-te din a ngai a ni, a ti bawk. Ram chhunga ṭhalaite chu hna thawh nei lo tumah an awm lohna turin an hnathawh tur siamsak a ngai a, hmeichhiate pawhin India ramah him taka awmin, mipate nen dikna chanvo ang khat rengin an nei tur a ni, a ti. Loneitute ngaihsak an ṭul thu sawi bawkin, an thlai thar chhuahte hralhna tur man pawh pangngai tak siamsak an ngai tih a sawi bawk. Heng thil pangate hi tihhlawhtlin a nih chuan, khawvelah India ram number one a nihna tur chu engmahin an dal thei dawn lo a ni, tiin a sawi.

Kejriwal chuan an hmalakna turah hian ram mipuite leh political party zawng zawng pawh tel vek turin a sawm. Mipuiten he mission hi an zawm a, an thawhho theihna turin ram chhung hmun hrang hrang tlawhkual a tum tih a sawi. He mission hi politics lam thil a ni lo tih a sawi bawk.

"Hei hi political party mission ni loin, ram pum tana mission a ni zawk. BJP leh party dangte pawh khawvela India ram number one ni thei tura siam tura rawn tel ve vek turin ka sawm a ni," a ti.