Covid booster dose pek hna chak zawka kalpui turin ti

Sorkar laipui chuan state leh Union Territory-te hnenah, India zalenna champha vawi 75-na lawmna puala Vaccination Amrit Mahotsav hnuaia mipuite hnena Covid booster/precaution dose, a thlawna pek chhuah mek chu chak zawka kalpui turin a ti.

Union health minister Mansukh Mandaviya chuan state leh UT-te hnenah precaution dose a thlawna lak theih a nih thute puangzar ṭha tur leh, rel station, school/college, sakhaw hmun pawimawhahte vaccination camp hi buatsaih a, a tam thei angin precaution dose an lak theihna atana ruahmanna siam turin a ti a ni.

Health Minister hian virtual hmangin state health minister-te meeting a neihpui a, sorkar flagship scheme hrang hrang kalpui a nih dante thlirletin, National Health Misison leh Pradhan Mantri Ayushman Bharat Health Infrastructurte Misson chungchang bakah, Emergency Covid Response Package-II hnuaia project hrang hrang kalpui mekte an sawiho bawk.

August 15 thleng khan ram chhungah Covid-19 vaccine precaution dose hi a la thei zingah 17% vel chauhin an la la a ni. Precaution dose la thei chin hi mi vaibelchhe 74.5 dawn an awm a, mahse an zinga 12,36,03,060 chauh pek a la ni. Sorkar laipui chuan India zalenna champha lawmna pualin July 15 aṭang khan precaution dose hi a thlawnin ni 75 chhung a pe chhuak dawn a ni.