Darkar 24 chhungin hri kai thar 1,993 awm
India ramah Ningani khan Covid-19 kai thar mi 1,993 an awm a, mi 73 he hri vang hian an thi bawk. Nimin thleng khan ram pumah he hri kai hi mi 35,043 an awm tawh a ni.
Union health and family welfare ministry chuan nimin khan hri vanga thi hi India ramah mi 1,147 an awm tling tawh tih a sawi.
Maharashtra chu hri kai leh thi tamna ber state niin, hri kai hi 10,498 an awm tawh a, mi 459 in an thihpui tawh a ni. A dawttu Gujarat-ah hri kai 4,395 awmin mi 214 in an thihpui tawh bawk.
Sorkar laipuiin hri leng darh tur venna atana ram puma inkharkhipna, lockdown a puan chu May 3 hian a tawp tawh dawn a, pawhsei a nih dawn leh dawn loh erawh thuchiang a la awm lo.
Defence minister Rajnath Singh kaihhruai, panel of minister chuan lockdown hi a tum hnihna atana pawhsei leh a, May 15 hman chhunzawm an duh. Punjab, West Bengal leh Telangana state-te pawhin lockdown pawhsei hi an duh bawk. Mahse hemi chungchanga thutlukna chu PM Modi-an a la siam dawn a ni.
PM-in minister-te
meeting neihpui
Prime minister Narendra Modi chuan lockdown kalpui mek, May 3-a a tawp huna hma lak zel dan tur sawipuiin nimin zinga khan cabinet minister ṭhenkhatte meeting a neihpui.
Nimina meeting-ah hian union home minister Amit Shah bakah, aviation minister Hardeep Singh Puri, commerce minister Piyush Goyal leh cabinet secretary Rajiv Gauba te an tel. An thil rel pawimawh zingah hian aviation industry chungchang, rel leh thlawhtheihna service ṭan leh a nih theih dan turte a tel a ni.