G20 meeting-ah Ravi Shankar Prasad a tel

Virtual G20 Digital Economy Ministers meeting Ningania neih­ah India aiawhin Union electronics and infor­mation technology minister Ravi Shankar Prasad a tel.

Ministry of Electronics and IT chuan thuchhuah siamin, "G20 Digital Eco­nomy Task Force Covid-19 Ministerial thu­chhuah chuan hripui leng dona kawngah digital hmanga khawvel pum inlungrual turin a ngen a, inbiakpawhna leh inkal­pawhna tichangtlung tur te, him taka Non-personal data inthleng tawn tur te, healthcare atana digital solution hman te leh inter­net khawvel him zawk siam turin khawvel pum a ngen a ni," an ti. 

G20 meeting-ah hian ram dang aiawh Digital minister 19 an tel bawk a, Covid-19 dona kawnga digital medium hman ṭangkai leh mipui humhimna kawnga nasa zawka hmalak an remti vek bawk.

Ravi Shankar Prasad chuan meeting-ah hian G20 ramte chuan mawhphurhna an nei tih sawiin, hun hrasa tak hmachhawn a nih lai hian economy ngialnghet leh rintlak, intluktlanna lam ngaihtuah a ṭul zual tih a sawi.

Prime minister Na­rendra Modi kaihhruaina hnuaia India sorkar hma­­lakna hrang hrang sawi bawkin, hrileng do mek chungah economy lam ngaihthah loh a pawi­mawhzia te pawh a sawi a ni.

G20 ramte chu digital action plan nghet tak hrilengdona kawnga duang turin a sawm a, India IT-ITeS Industry pawimawhnate pawh a sawi bawk.