Metropolitan city pangate red zone-ah la dah

Union health ministry chuan nimin khan May 3-a lockdown zawh hnuah pawh ramchhunga metropolitan city panga -  Delhi, Mumbai, Chennai, Kolkata, Hyderabad, Bengaluru leh Ahmedabad-te chu hri darh nasatna hmun, red zone a puan zel an la nih tur thu a tarlang.   

Covid-19 vangin March ni 25 khan inkharkhip (lockdown) chu puan a ni a, hemi hnu hian sorkar laipui chuan May 3 thleng a pawhsei leh a ni. India rama he hri darh nasatna hmun, a bikin heng metropolitan khawpui 5-ahte hian lockdown zawh hnuah pawh inkhuahkhirhna chu hman chhunzawm zel a la ni ang.

India-ah hian hri len dan azirin hmun hrang hrang chu zone thumah ṭhen an ni. Hri darh nasatna hmun hi red zone tih a ni, red zone hi 130 a awm mek a ni, hri lenna, mahse a kai an tlemna hmun chu orange zone tih niin he zone hi 284 a awm a, hri kai awm lohna green zone hi 319 a awm bawk. Heng zone hrang hrangte hi union health secretary Preeti Sudan chuan state leh union territory zawng zawnga chief secretary-te hnenah a thawn vek a ni.

Red zone hi Uttar Pradesh leh Maharashtra-ah a tam ber a, hmun 19 leh 14-ah a awm. A dawtah hian Tamil Nadu (12) leh Delhi (11) a ni. Maharashtra khawpui Mumbai-a suburban area zawng zawng chu red zone-a puan a ni a, Delhi-a suburban area Faridabad, Gautam Buddha Nagar leh Meerut-te chu red zone-a puan a ni bawk.

Thingtlang leh khawpuia district ṭhenkhat a veng emaw hmun ṭhenkhatte chu khuahkhirh ngai zual, contaminated zone leh buffer zone-a puan a ni. Red zone leh orange zone-a contaminated zone leh buffer zone awmte chu kimchanga an dinhmun hi thehlut turin sorkar laipui chuan state leh UT-te a ngen bawk a ni.

Contaminated zone-ah hian khuahkhirhna khauh tak hman chhunzawm a la ni dawn a, damdawi leh a kaihhnawih bakah, chakkhai (essential good and service) tih loh chu khap chhunzawm a la ni rih ang. He zone-a awmte hi test runpui neihpui zel tum a ni bawk. 

Buffer zone-ah hian hri kai nia rinhlelhte chu fimkhur taka zawn emaw enthlitlai reng a la ni dawn a, he zone-a awmte hriselna dinhmun chu enzui reng a ni bawk ang. Red zone-a awm emaw orange zone-a awmte chu ni 21 chhunga hri kai thar an hmuh loh chuan a green zone-a puan an ni ang.