Sasikala-i chungchanga report petu DIG transfer

Bengaluru-a Parappana Agarahara central prison-a tang mek, AIADMK hotu VK Sasikala-i’n jail hotute thamna pea jail chhungah VIP anga enkawl a nih thu report petu, Bengaluru DIG (Prisons) D Roopa-i chu report a pek hnu lawkah traffic department-ah sawn a ni.

Roopa-i’n Home Deparment leh Director General of Police (DGP) H N Sathyanarayana Rao-a hnena report a thehluhah, Sasikala-i hian official-te chu thamna cheng vaibelchhe hnih a pe a, jail chhungah hian a ei tur siamna tur bik choka pek a nih bakah, amah tlawh theih hun pawh thlahdul sak a nih thu a sawi a ni. Thamna a pek zingah hian DGP pawh hi a tel niin a sawi bawk.

DGP Rao chuan Roopa-i puhna chu thu dik lo a nih thu leh, tang hnen aṭang­in eng thil mah a dawn loh thu a sawi. Sasikala-i pawh duhsak bik a ni lo a, hmeichhe tang dang ang bawka enkawl a nih thu a sawi a, Roopa-i’n a puhna chu thu belhchian dawl lo leh finfaihna awm lo niin a sawi.

Karnataka Chief Minister Siddaramaiah chuan Sasikala-i chungchanga report chu chhui chiang turin thupek a tichhuak nghal a, CM office chuan Roopa-i hi hriattirna pein, media mite pawh dawr tawh lo turin an ti bawk. Hemi chungchang chhuina hi thla khat chhunga zawhfel tura tih a ni.