J&K-ah voter nuai 25 vel awm belh ; Tualchhung party-te an lungawi lo

Jammu and Kashmir special status pekna, Article 370 tihtawp a nih hnuah a vawi khatna atana electoral roll summary revision neihah, vote nei hi nuai 25 velin an pung dawn niin election official chuan a sawi. Heng zingah hian state pawn lam mi pawh an tel thei dawn a ni.

Chief Electoral Officer Hirdesh Kumar-a'n voter an pun belh nasa dawn tiha a sawi chu chief minister hlui pahnih, Omar Abdullah leh Mehbooba Mufti-te chuan chhang nghalin, centre-a BJP sorkar an bei zui. Abdullah chuan J&K mipuite chu dik taka vote thlak theih hun siamsak an nih chuan state pawn lam mi voter dah belh vak chu BJP chuan a chak phah dawn chuang lo, a ti. Mufti pawhin J&K-a khawsa nghet ni lote voter list-ah dah belh vak chu BJP-in inthlan result thlira a tih niin a tum ber chu tualchhung party-te chakna tihchhiatna leh rorel chhunzawm zel an tumna a ni, a ti ve bawk.

Kumar chuan electoral roll ennawn mek chu a hautak hle tih sawiin, November 25-ah zawh hman an tum tih a sawi. Revision nei mekah hian kum 2022, October 1-a kum 18 tling tur chin thlengin dah luh an nih thu a sawi. J&K state ṭhiah taka Article 370 hman anih laia vote nei thei lo mi tam tak chu Peoples Act hnuaiah voter-ah hian dah luh thar an ni tih a sawi. J&K-ah hian kum 18 chunglam hi mi nuai 98 vel awmin an chhut a, mahse voter list hnuhnung berah chuan nuai 76 an awm. Hei vang hian final list-ah chuan voter dah thar hi nuai 20-25 vel an awm belh a rinawm thu a sawi.

CEO Kumar chuan voter list-a tel tur hian J&K-a cheng ngei a ni tih lantirna certificate a ngai kher lo tih a sawi. Hei vang hian state pawn lam aṭanga lut, hnathawka awm, zirlai leh hlawhfate pawhin voter list-ah hian an inziaklut thei a, document-te chu sorkar official-ten an lo enfiah ang a, thutlukna an siam mai dawn a ni, a ti.

Kumar chuan delimitation exercise kalpui hnuah, J&K-a assembly seat chu 90-ah tihpun a ni tih sawiin, polling station pawh 600 siam belhin, polling station hi 11,370 a awm tawh dawn tih a sawi.