BJP-in pawngsualtua puh a thlawp chungchangah Rahul Gandhi-a'n PM Modi a bei

Congress party hruaitu Rahul Gandhi chuan BJP-in pawikhawihtua puhte a thlawp chuan an party rilru dik tak a tilang a ni tiin, prime minister Narendra Modi chu hetiang politics an kalpui avangin zahthlak a ti em, tiin a zawt.

Rahul Gandhi chuan Uttar Praesh-a Unnaao leh Hathras, Jammu and Kashmir-a Kathua-a pawngsualna thleng leh, Gujarat sorkarin kum 2002-a pawngsual leh tualthahna thlenga thiam loh chantirte tun kara a chhuah zalen tak chungchangte a sawichhuak.

"Unnao-ah BJP MLA humhim tumin an bei a, Kathua-a pawngsualtute thlawpna lantirin kawng an zawh a, Hathras-ah sorkar chuan pawngsualtute a thlawp bawk. Tunah Gujarat-ah pawngsualtute chhuah zalenin a chawimawi leh a ni. Misualte an thlawp tlat hian BJP rilru dik tak leh, hmeichhiate laka an rilru awmdan a tilang chiang hle a ni," tiin Gandhi chuan a sawi.

Gujarat-a Bilkis Bano chhungkua member pasarih thah leh pawngsual rawn chungchangah kum 2008, January 21 khan special Central Bureau of Investigation (CBI) court, Mumbai chuan mi 11-te chu dam chhung tang turin a hrem a ni. Mahse Gujarat sorkar chuan August 15 khan heng mi 11-te hi remission policy hnuaiah a chhuah zalen a ni. Heng mi 11-te hremna ennawntu panel-ah hian BJP MLA pahnih an tel thu Congress senior leader P Chidambaram chuan a sawi bawk.