Sorkar laipuiin YouTube channel 8 a block

Sorkar laipui chuan thu dik lo leh sakhaw lama inhuatna chawk chhuak thei zawnga thil tichhuaktu YouTube channel pariat a block thu a sawi, heng zinga pasarih chu India-a siam niin, pakhat chu Pakistan ami a ni. Hei bakah hian Facebook account pakhat, Facebook post pahnih a block tel bawk.

YouTube channel pariat block-te hian viewer vaibelchhe 114 an nei tawh a, subscriber pawh nuai 85 chuang an awm niin union ministry of information and broadcasting chuan a tarlang.

Sorkarin channel a block-te chu - Loktantra Tv (subscriber nuai 12.90), U&V TV (subscriber nuai 10.20), AM Razvi (subscriber 95,900), Gouravshali Pawan Mithilanchal (subscriber nuai 7), Sarkari Update (subscriber 80,900) leh Sab Kuch Dekho (subscriber nuai 19.40 ) te an ni a, hengte hi India based vek an ni. Pakistan-based channel News Ki Dunya (subscriber 97,000) a block tel bawk.

Ministry chuan heng channel-te hian sakhaw hrang hrang inkara inhuatna chawkchhuak thei thilte tichhuakin, video-ah thu dik tawk lo an tarlang fo niin a sawi. Sorkar thuchhuah ni awm tak sakhaw kaihhnawih thilte pawh an tilang fo a, sakhaw inkara indona thute pawh an puang a ni, a ti. Hei vang hian Information Technology Act, 2000-a Section 69A hnuaiah Ministry chuan heng channel-te hi a block tih a sawi.

Kum 2021, December thla aṭang khan sorkar laipui chuan YouTube-based news channel leh social media account 102 a lo block tawh a ni.