CBI-in Delhi Dy CM Sisodia chenna in dap sak

Central-a BJP kaihhruia sorkar laipuiin Delhi liquor policy-ah thil dik tawk lo a awm nia a sawi avangin, Central Bureau of Investigation (CBI) team chuan nimin khan Delhi deputy chief minister Manish Sisodia chenna in an dap. Delhi-a rorellai, Aam Aadmi Party (AAP) sorkar chuan sorkar laipui puhna hi na takin a pha thung.

CBI hian Delhi-a Manish Sisodia chenna in bakah, state pasarihah hmun 20 dang an dap tel bawk.

Delhi Excise Policy hi nikum November thla aṭang khan hman ṭan ani a, he policy hnuaiah hian zu zawrhna dawr license chu private kutah dah a ni. Excise department enkawltu, Manish Sisodia chuan he policy hi sorkarin zu zawrhna hmun a siamah eirukna leh thil dik tawk lo thleng ṭhin danna atana siam a nih thu a lo sawi tawh a ni.

Sisodia chuan nimin khan a twitter-ah CBI-in a in an dapsak thu hi sawilangin, central agency chu ṭha taka a lo thawhpui tur thu leh, a laka dik lo taka thiltih engmah an hmu dawn lo tih a sawi nghal bawk.

Delhi sorkarin health leh education sector lama hna a thawh ṭhat em avangin sorkar laipui chu a lo buai phah a, hei vang hian heng department changtu minister-te chu a rawn bitum nghal niin Sisodia chuan a sawi. May thla khan Delhi health minister Satyendar Jain chu man niin, tun thlengin jail-ah a la tang a ni.

Delhi chief minister leh AAP hotu, Arvind Kejriwal chuan nimin khan press conference a nei nghal a, sorkar laipui tirhte chuan eng ang pawhin dapin hrek tum mah se, a kaihhruai sorkar leh an party chuan ram mipuite tana thil ṭha ti tura thawhna chu an dang thei dawn chuang lo tih a sawi. "Kan hnathawhna kawnga min tibahlah tumtu tam tak an awm zel ang. A hma pawhin hetianga indapna hi a lo thleng tawh a, mahse thil engmah dik lo haichhuah tur an hre lo. Tun ṭumah pawh dik lo engmah an hmu dawn lo. CBI chu ṭha takin kan thawhpui zel ang," a ti.

Kejriwal chuan, "Delhi education model in fak a hlawh ni leh, America-a newspaper lian ber NYT front page-a Manish Sisodia thlalak ngei dahlan a nih ni takah, CBI chu Sisodia in kawtah, a in dapsak turin an rawn lang nghal a ni," a ti. NYT in Sisodia hmalaknate a rawn cover hial chuan khawvela education minister ṭha ber a nih zia a tilang a ni, tiin a sawi bawk.

AAP chuan BJP hian politics lama khingpuite tihchhiat a tumnaah AAP minister-te a bitum fo niin a puh. Party MP Raghav Chadha chuan mipuiten Arvind Kejirwal an duh zia leh a lar chhoh zel dan an hmuhin BJP leh PM Modi chu an hlauthawng a, central agency CBI chu an mi bitumte hmachhawn tur hian an rawn chhuah a ni, a ti. Tum pakhat an nei a, chu chu Kejriwal danbeh tlat a ni,tiin a sawi.

Delhi lieutenant governor Vinai Kumar Saxena chuan Delhi-a AAP sorkarin excise policy a siam chu mimal sumdawng liante duhsakna lantir tumna nia puhin, CBI chhui chian tir turin a lo rawt tawh a ni.