JK electoral roll-a tualchhung mi ni lo telh vangin lungawi lohna lantir

Jammu and Kashmir-a electoral roll ennawn neih mekah, J&K-a khawsa nghet ni lote thun tel an nih avangin nimin khan People's Democratic Party (PDP) chuan lungawi lohna an lantir.

PDP hruaitute chuan BJP in a nawr luih avangin roll ennawnaah hian state pawn lam mi, an state-a awm nghet ni chuang lote pawh telh vek an ni tih an sawi.

National Congress (NC) president Farooq Abdullah pawhin August 22-ah all-party meeting a ko tih sawiin, he hunah hian electoral roll ennawn hna kalpui mek anih dana an hmalak dan tur an ngaihtuah dawn tih a sawi a ni.

Hetih lai hian J&K sorkar chuan J&K special status pekna, Article 370 tihtawp a nih tawh avangin India khua leh tui nihna nei tupawh, J&K-a khawsa lailawk mek pawh roll-ah hian a inthun thei a ni, an ti. Article 370 hnuaiah kha chuan J&K-a assembly electoral roll-a thun tur chu state-a khawsa nghet chauh pawm a ni a, mahse hei hi phut kher a ni tawh lo tih an sawi.