Ruahsur nasa avangin ni 2 chhungin mi 35 thi

State eng emaw zatah ni hnih liam ta chhungin ruah nasa takin a sur a, ruahsur vanga chhiatna thlengah mi 35 an thi.

Himachal Pradesh-ah chuan Zirtawpni aṭang khan ruah a la sur chhunzawm reng a, ruahsur vang hian tuilian leh leiminte a thleng a, mi 22 in nunna an chan. Nunna chan zingah hian chhungkaw khata member pariat an tel. State chhung hmun hrang hrangah chhiatna a thleng a, mi 10-in hliam an tuar a, chin hriat lohin mi paruk an la awm mek bawk.

Uttarakhand-ah tuilian bawhawk thlengah mi pali an thi a, chin hriat lohin mi 10 an awm. Lui kam leh a hnaivaia awm mi sang tel chu hmun him lamah sawnchhuah an ni. Lui tam tak chuan hlauhawm chhinchhiahna an pel a, tuilian hian kawngpui leh lei eng emaw zat a len chhe bawk a ni.

Odisha-a thingtlang khaw 500-ah mi nuai 4.5 velin tuilian an tuar mek. Ruah a la sur chhunzawm reng avangin chhiatna nasa zawk a thlen hlauhthawnna a la lian hle. Official-te chuan chhiatna thlengah mi paruk an thi tawh tih an sawi. District eng emaw zatah sorkar chuan tuilian tuarte lakchhuah hna a kalpui mek bawk. Inrinni khan Mahanadi luiah mi 70 chu an chuanna lawng nen chhanchhuah an ni.

Jharkhand-a district eng emawt zatah ruahsur nasa avangin electric ban leh thingkungte a tlu nasa hle. Ramgardh district-a Nalkari lui lianah mi pahnih an tlahlum a, West Singhbhum-a in chimah mi pakhat a thi bawk.

Jammu and Kashmir-ah pawh ruahsur nasa avanga Vaishno Devi Yatra tihtawp lailawk chu nimin zing aṭang khan chhunzawm leh a ni.