Delhi Police-ten loneitu pawl hotu Rakesh Tikait an hreng

Delhi police-te chuan loneituten nawrh an huaihawtnaa tel tura kal, loneitu pawl hotu, Rakesh Tikait chu lo dangin an hreng zui.

Loneitute hian vawiin hian Jantar Mantar-ah ram chhunga unemployment rate sang zel duh lohna lantira nawrh huaihawt an tum a, he huna tel turin Tikait hi a kal a ni. Mahse Delhi police-te chuan Ghazipur-ah an lo dang a, Madhu Vihar police station-ah an hruai nghal a ni. Police official chuan Tikait hi nawrhna hmuna kal lo a, kir leh turin an ngen tih a sawi.

Bharatiya Kisan Union (BKU) thupuangtu Tikait chuan Delhi police-te chu sorkar laipui thupek anga che niin a sawi. "Sorkar laipui duh dan anga che, Delhi Police-te chuan loneitute hi an dang bet thei dawn chuang lo. Min man hian revolution dang a rawn hring chhuak zawk dawn. A tawp thlengin kan bei zel dawn a ni. Kan tawp dawn lo a, kan chau mai dawn lo a, kan tlawm dawn hek lo," tiin a twitter-ah man a nih chungchang a sawizui a ni.

Delhi minister leh Aam Aadmi Party (AAP) hruaitu Gopal Rai chuan Tikait-a hren a ni chu a dem thu sawiin, nawrh huaihawtnaa a kal tur dan a ni chu thil zahthlak tak a ni, a ti.

Loneitute nawrh huaihawt tum vang hian Delhi police-te chuan venhimna khauh takin an kalpui a, Delhi-Haryana border-ah daidanna an siam a, duty pawh ṭhahnem tak an indah belh bawk.