Manish Sisodia lakah LOC tihchhuah a ni lo tih CBI in sawi

Central Bureau of Investigaton (CBI) chuan Delhi deputy chief minister Manish Sisodia lakah Look Out Circular (LOC) a tichhuak nia sawi chu a dik lo tih a sawi. LOC hi an tichhuak lo a, tichhuah a ṭulna an hre rih lo tih an sawi bawk.

Delhi Excise Policy kalpui a nih danah thil fel tawk lo a awm nia sawiin, CBI hian kar liam ta Zirtawpni khan Deputy CM chenna in an lo dapsak tawh a ni. Hemi hnu hian Sisodia leh midang 12 lakah LOC a tichhuak leh nia sawi a ni. CBI chuan LOC a tichhuak lo a, thu zawhfiah tura hriattirna erawh a tihchhuah thu a sawi thung.

Sisodia chuan a chenna in dapsak a nih chungchangah, a twitter-ah central-a BJP sorkar chu na takin a bei zui. CBI-te chuan thil dik lo engmah an hmu lo tih sawiin, pawisa tihchingpen pakhat pawh an hmu lo tiin, prime minister Narendra Modi chu eng ang lemchanna nge a kalpui tih a zawt zui bawk.

Delhi Excise Policy hi nikum November 17 aṭang khan hman ṭan a ni a, Delhi lieutenant governor Vinai Kumar Saxena chuan thla hmasa khan he policy kalpui a nih danah dan bawhchhiatna leh thil fel tawk lo a awm nia sawiin, central agency-te chu chhui chiang turin a ngen a ni.