NDA vice president candidate atan Naidu thlang

Central-a rorellai, BJP kaihhruai NDA chuan vice president candidate atan BJP hruaitu hlun Venkaiah Naidu an thlang a, nimin khan Venkaiah Naidu hian nomination paper a thehlut nghal.

August 5-a vice president thlanna neih turah NDA candidate Naidu leh eptu pawl candidate inṭawm, Gopalkrishna Gandhi-te an inkhing dawn ta a ni.

BJP Parliamentary board chuan Thawhṭanni zan khan vice-president candidate tur hi an ruat a ni. Vice-president candidate atana ruat a nih tak avangin Naidu hi nimin khan NDA sorkara Union Minister a nihna aṭangin a bang nghal bawk. Naidu hian Ministry of Information and Broadcasting leh Housing and Urban Affairs a enkawl a, a ban tak avangin a ministry hi midangin an hmui rih dawn a ni. Textiles Minister Smriti Irani chuan Information and Broadcasting Ministry a chang tel dawn a, Rural Development and Pancahity Raj minister Narendra Tomar chuan Urban Development Ministry a lo hmui bawk ang.

NDA hnuaia BJP thawhpui party dangte chuan kum 68 mi, Naidu hi an thlawp vek dawn niin BJP president Amit Shah chuan a sawi a, Naidu chu ram chhunga hruaitu tawnhriat nei ṭha leh hming langsar ber zinga mi a nih thu a sawi. Prime Minister Narendra Modi-a pawhin Naidu chu kum tam tak alo hriat tawh thu leh, a hnathawh leh a inpekna a ngaihlut thu a sawi a, vice president tling tak tur a ni, a ti.

Nimina Naidu-a’n nomination paper a thehluhnaah hian BJP hruaitu LK Advani, Prime Minister Narendra Modi, BJP president Amti Shah leh NDA hruaitu dangten an ṭawiawm a ni.

Vice President ṭanglai, Hamid Ansari-a term chu August 10 hian a tawp dawn a ni. August 5-a vice president thlan tur hi Parliament in hniha member 790-te chuan an thlang ang. Vote thlak ni vek hian result pawh puan nghal a ni ang.