Jantar Mantar-ah loneituten nawrh huaihawt

Swaraj Abhiyan kaihhruaia July 6 aṭanga loneitute puala huaihawt, Kisan Mukti Yatra chu nimin khan Delhi khawpuiah neih a ni a, hmun hrang hrang aṭangin loneitute thlavang hauhsakin political hruaitu, activist leh loneitute mi tam tak an pungkhawm.

Yatra hi July 6 khan Madhya Pradesh-a Mandsaur-ah neih ṭan a ni a, state parukah neih a ni tawh. Nimin khan Delhi-a Jantar Mantar-ah loneitu mi tam tak pungkhawmin, sorkar laka an thil phutte an tarlang. Loneitu pungkhawm­te chuan Mandsuar-a loneitute nawrh huaihawt zinga mi ṭhenkhat police-te silai hmehpuaha an thih chungchangah Prime Minister Narendra Modi a la ngawi reng chu hriatthiam har an tih thu an sawi.

Jantar Mantar-a nawrh huaihawtnaa tel, MP Raju Shetti chuan Narendra Modi hian inthlan dawnah loneitute loan ba ngaihdam chu thlawpin a lo campaign pui ṭhin tih a sawi a, mashe a hnuah sorkar chuan loneitute loan ba ngaihdam chu a theih loh thu a sawi leh si a ni, a ti. Hei hi tih theih loh a nih chuan engvangin mipuite hnenah a lo intiam a, election manifesto-ah a lo telh tih sawifiah tura a phut thu a sawi bawk.

CPI(M) General Secretary Sitaram Yechury pawhin loneituten an dikna chanvo an neih theihna turin a beihpui zel dawn tih a sawi a, loneitute harsatna tawh mek chungchang chu Parliament-ah pawh sawi a tum thu a tarlang.

Senior advocate Prashand Bhushan pawhin thu sawiin, sorkar laipui chuan loneitute ngaihthahin, sumdawng liante duhsakna lam hawi policy a siam zel niin a sawi. Sumdawng hausate ham­ṭhatna ngaihtuah a, loneitute dinhmun tichhiatsakah sorkar chu a puh bawk.