Sorkarin bawng talh khap chhan a sawifiah

Sorkar laipui chuan tun hnaia talh atana bawng hralh leh lei a khapna chhan chu sawifiahin, hei hi ransa humhalhna tur leh, dan loa ransa tawlh leh hralhna thleng ṭhin venna atana ti a nih thu Lok Sabha-ah a sawi.

Minister of Environment, Forest and Climate Change Harsh Vardhan chuan ziaka zawhna a chhannaah he thu hi sawiin, Prevention of Cruelty to Animals (Regulation of Livestock Markets) Rules chu ransa humhalh­na atan leh enkawlna ṭha an dawn theihna tura tih a ni thu a sawi. He dan kalpui tur chungchangah hian kumin January 16 khan draft notification tihchhuah a ni a, sawisel leh rawtna nei tan ni 30 hun pek a ni bawk niin a sawi. 

Minister chuan hun hawn chhung hian state sorkar lam aṭangin sawiselna a awm lo a, mahse a taka hmang tura hriattirna tihchhuah a nih hnuah dodalna a awm leh niin a sawi. Sorkar laipuiin bawng talh khapna thupek a tihchhuah hi BJP sorkarna ni lo state hrang hrangte chuan an sawisel nasa hle. Kar hmasa khan Supreme Court chuan khapna thupek tihchhuah hi a stay sak a ni.