Mayawati-i banna pawmsak lo mai thei

Bahujan Samaj Party (BSP) hotu Mayawati-i chu Uttar Pradesh-a Dalit hnam kutthlak leh sawisak an nih chungchang, House-a sawi phalsak a nih loh avangin Thawhlehni khan Rajya Sabha rorel inkhawm aṭangin a chhuak tau a, banna a thehlut zui bawk.

Hemi hnu hian Dalit hruaitu, Mayawati-i hian Rajya Sabha secretary general Shamsher Shariff-a office-ah banna lehkha a thehlut zui nghal a ni. Mahse banna a thehluh danah kalphung duansa a zawm loh avangin a banna hi pawm a ni lo maithei nia sawi a ni.

Mayawati-i chuan banna lehkha, phek thuma chhah a thehluhah hian House-a thil thleng chungchang chu chipchiar takin a sawilang a, hei hi kalphung kalh nia sawi a ni. Parliamentary procedure-ah chuan parliament member hian a ban duhna chhan hi a sawilang tur a nilo, tih a ni.

Banna lehkha hi Hindi-i a ziak a, Mayawati-i chuan, “BJP emaw NDA emaw hian hnam hnuaihnung zawkte tana thu ka sawi an phal lo a nih chuan, he Parliament-ah hian ka awmzui zel thei bik lo a ni”, a ti.

Minister of state for parliamentary affair Mukthar Abbas Naqvi chuan Mayawati hian banah a vau avangin House chairman hi a zahlo hle a ni tiin, thupha chawi turin a phut thung.

Mayawati-i ban dilna hi pawmsak anih chuan, BSP leh eptu lamin MP pakhat an chan dawn a, hetihlai hian UP-a BJP chuan MP hi a neih belh thei dawn a ni. Rajya Sabha member-te hi state MLA-te thlan a ni a, UP-ah hian Chief Minister Yogi Adityanath-a kaihhruai BJP sorkar chuan majority a nei a ni.