Loneituten Delhi-ah nawrh an huaihawt

Loneitute chuan nimin khan ram chhunga hnathawh nei lo, unemployment rate sang zel avanga lungawi lohna lantirin Delhi-a Jantar Mantar-ah 'Mahapanchayat' an huaihawt. Nawrh huaihawt zinga mi eng emaw zat man an ni.

Delhi police-te chuan loneituten lungawi lohna lantir a, 'Mahapanchayat' an neih dawn vang hian a hma aṭangin khawpui chhunga venhimna khauh takin an kalpui nghal a, border entry hrang hrangah duty pawh an dah belh a ni. Rel kawng, bus station leh metro station-ah pawh police ṭhahnem tak an duty a, khawpui chhunga lut motor-te endik zel an nih avangin traffic pawh a buai phah hle.

Loneitute hian unemployment rate sang zel duh lohna an lantir bakah, an thlai tharchhuahte tan minimum support price (MSP) chu mumal taka hmang turin sorkar an phut bawk. Hei bakah hian farm law duh lohna lantira kum khat nawrh an huaihawt chhunga loneitu eng emaw zat thubuai siamsakte chu an thubuaite hi sut vek turin an phut bawk a ni.

Kar liam ta khan Samyukt Kisan Morch chuan Uttar Pradesh-a Lakhimpur Kheri-ah kum 2021-a union minister Ajay Mishra fapa, Ashish Mishra-a'n Lakhimpur Kheri mi pariat a chil hlum mi pariatte tana dikna rorelna kalpui phutin nawrh an lo huaihawt tawh bawk. Hemi ṭuma mi pariat thi zinga pali hi loneitu an ni.

Nimina nawrh huaihawtnaa tel tum, loneitu pawl hruaitu Rakesh Tikait chu Ghazipur border-ah police-ten lo dangin an hreng zui a ni. A hnuah Tikait hi chhuah mah se Delhi-a a kal erawh an phalsak lo.

'Mahapanchayat' huaihawttu zinga mi, Abhimanyu Singh Kohar chuan Jantar Mantar-a an hun hmannaa tel tum, Punjab, Haryana leh Uttar Pradesh aṭanga loneitu kalte chu dan beh an ni a, Jantar Mantar an pan phalsak an ni lo tih a sawi. Heng mite hi Gurudwara Bangla Sahib, Rakabganj leh Moti Bagh-ahte hruai an ni a, a hnuah an chhuah leh an ni, a ti.

Loneitu pawl hruaitu, Baldev Singh Sirsa chuan an thil phutte chu nawrh an huaihawt hmang chauhin tihlawhtlin sak an ni ṭhin tih a sawi a, hei vang hian sorkarin an thil phutte a tihhlawhtlin loh chuan nasa zawkin nawrh an huaihawt chhunzawm tur thu a sawi.