MP-ah ruahsur nasat vangin school khar

Madhya Pradesh state chhung hmun hrang hrangah ruah nasa takin a la sur chhunzawm zel a, hei vang hian nimin khan state khawpui, Bhopal leh Jabalpur bakah district eng emaw zatah school khar a ni.

State chhunga lui tam tak chu an lian tawh a, dam gate-te pawh hawn an ni bawk. Hmun hniam lai deuhte chu tuiin a chim nasa tawh hle a ni.

India Meteorological Department (IMD) chuan state mipuite chu a ṭul tawp a nih loh chuan ruahsur hnuaiah zin chhuak rih lo turin a chah.

Nimin zing dar 8:30 thleng khan darkar 24 chhungin Bhopal-ah hian ruahtui 190.5 mm a tla hman a, Guna-ah 174.9 mm, Sagar-ah 173.9 mm, Raisen-ah162 mm leh Jabalpur-ah 160 mm a tla hman a ni.

Ruahsur leh thli tleh vangin Bhopal khawpui chhungah thingkung tam tak a tlu a, hmun eng emaw zatah power supply a khaihlak phah bawk.