Sisodia-a'n BJP zawm tura sawmna a dawng tih a sawi

Delhi deputy chief minister, Aam Aadmi Party (AAP) hruaitu Manish Sisodia chuan BJP lam aṭangin an party zawm tura sawmna a dawn thu leh, BJP a zawm chuan a laka case thehluhte pawh tihtawp vek an tiam thu a sawi.

Delhi excise policy kalpuinaah thil fel tawk lo awm nia sawi a Central Bureau of Investigation (CBI) in mi 15 laka FIR a thehluh zingah Sisodia hi a tel a ni. Mahse Sisodia chuan an puhna hi thu dik lo a ni tih sawiin, mi phiarrutu leh eirute hmaah a kun ngai dawn lo tih a sawi nghal bawk.

Sisodia chuan a twitter-ah BJP lam aṭanga message a dawn thu sawiin, "AAP hi chhuahsanin BJP zawm la, CBI leh ED-ten i laka case an siamte chu kan titawp vek ang," tiin a rawn sawi a ni, a ti. "Maharana Pratap thlah leh Rajput ka ni a, mi phiarrutu leh eirute hmaah ka kun dawn lo a, ka lu tansak nih pawh ka inhuam zawk a ni. Case min siamsakte hi thu dik lo vek a ni a, in duh dan angin engpawh ti rawh u," tiin BJP sawmna hi a chhang tih a sawi.

Kar liam ta Zirtawpni khan CBI chuan Delhi excise police kalpuinaa eiruknaa inhnamhnawiha puhin Sisodia chenna in hi an lo dap tawh a ni.