Dan kalhin Sasikala-i ṭum 23 tlawhtu neih phalsak

Bengaluru Central Prison-a tang mek, AIADMK hruaitu VK Sasikala-i chuan February 16 leh June 16 inkar chhung khan tlawhtu 23 a nei nia sawi a ni a, hemi chhung hian amah tlawhtu mi 48 a hmu.

Right to Information (RTI) hmanga zawhna chhannaah hemi chungchang hi tarlan a ni a, mahse dan chuan hemi chhung hian Sasikala-i hian ṭum 8 chauh tlawhtu a neih a phalsak a ni.

Supreme Court thupek angin Sasikala-i leh a laichin te pahnih - Elavarasi leh Sudhakaran-te chu kumin kumtir lam khan an sum lakluh phu loa hausa-a puhna thubuaiah jail tan tir an ni. Sasikala-i hi ṭum 23 tlawhtu neih phalsak a nih chhung hian Elavarasi chu ṭum 10 phalsak a ni thung.

Tun hnaia deputy inspector general of police (prisons) hlui Roopa D Moudgil-i report tihchhuaha Bengaluru jail-ah hian dan palzut a nih thu sawiin, Sasikala-i hian jail official-te thamna cheng vaibelchhe hnih a pek avangin VIP treatment pek a nih thu a lo sawi tawh a ni. Thamna sum a pek zingah hian director general of police (prisons) HN Sathyanarayana Rao pawh a tel niin a sawi. Hemi chungchang hi chhui chian mek a ni.