Covid-19 kai enkawl dam nuai 7 chuang awm tawh

Ministry of Health and Family Welfare-in nimina report a tihchhuahah Covid-19 kai hmuh chhuah thar 40,425 an awm a, hei hi ni khata hri kai hmuh chhuah thar tam ber ni niin, ni khat thil thua case thar sing li a awm tlin vawi khatna a ni. 

India ramah hripui kai mi 11,18,043 lai an awm tawh a, MoHFW-in report a tihchhuahah hian darkar 24 chhungin enkawl dam 22,664 an awm avangin hri kai enkawl dam 7,00,087 an awm tawh thung. Hetiang zat lai enkawl dam an nih tawh hnu hian ram chhung hmun hrang hrangah hri kai mek 3,90,459 an la awm a, thihpui 681 awm lehin hri len ṭantirh aṭanga nimin sorkar report tihchhuah thleng hian Covid-19 vangin  mi 27,497 an thi tawh.

Hri kai enkawl dam tawh rate hi 62.61% a ni a, thihpui rate hi 2.45% a ni bawk.

Ladakh, Delhi, Haryana, Rajasthan leh Gujarat-te chu state leh UT zinga recovery rate san zualna niin 72% aia sang recovery rate an nei tawh. National average aia recovery rate sang state 18 lai awm tawhin Manipur, Nagaland, Sikkim, Mizoram leh Andaman Nicobar Islands-ahte chuan Covid-19 vanga thi report a la awm lo. 

Thihpui rate-ah pawh national average aia thi rate hniamna zawk state leh UT 29 lai a awm a, ram puma hri kai aṭanga 67% hi chu Maharashtra, Tamil Nadu, Karnataka, Andhra Pradesh leh Uttar Pradesh-a mi an ni. 

Indian Council of Medical Research (ICMR) chuan nimina report an tihchhuahah darkar 24 chhungin Covid-19 sample 2,56,039 an test tih sawiin hri len ṭantirh aṭanga nimina report an tihchhuah thleng hian sample 1,40,47,908 an test tawh a ni. 

Ramchhung hmun hrang hrangah Covid-19 test-na atana laboratory pawmpui 1,268 a nei tawh a, chung zinga 890 chu sorkar laboratory niin 378 chu private laboratory a ni thung. 

India rama Covid-19 kai tam berna state Maharashtra-ah chuan nimin khan hri kai 9,518 lai hmuh chhuah thar an awm leh.

Maharashtra-ah hian hri kai 3,10,455 awm tawhin a zatve aia tam 1,69,569 chu enkawl dam an ni tawh a, 1,29,032 chuan la kai mekin 11,854-in an thihpui tawh. Nimina sorkar report tihchhuahah chuan hri vang hian mi 258  an thih belh leh a ni.

Tamil Nadu-ah chuan hri kai 1,70,693 an awm tawh a, heng zinga 1,17,915 chu enkawl dam tawh niin 50,297 chuan an la kai mek a, 2,481-in an thihpui tawh bawk. India ram khawpui Delhi-ah chuan mi 1,22,793-in Covid-19 an kai tawh a, enkawl dam hi an tam tawh hle a, 1,03,134 lai enkawl dma tawhin hri kai mek 16,031 chiah an awm tawh. Hetihlai hian mi 3,628-in an thihpui tawh a ni.