Gangster Vikas Dubey thawhpui pahnih man

Uttar Pradesh police-te chuan nimin khan gangster Vikas Dubey thawhpui Jaykant Vajpayee leh Prashant Shukla chu an man a, Kanpur-a police pariat thihnaa inhnamhnawiha puh vanga man an ni. 

"July 1 khan Dubey chuan Jaykant Vajpayee hi a bia a, a hnuah Vajpayee leh Shukla hian Dubey an hmu. Dubey chuan pawisa, cheng 2,00,000 leh revolver 25 a lo pe a ni. Police pariat thah an nih avanga motor pathum hmanga Dubey tlanchhuah theihna kawnga puitu nia rinhlelh an ni. July 4 khan heng mite hi chhui an ni tih an inhriat hnuah an tlan bo," tiin UP police-te chuan thuchhuah an siam. 

He mite pahnih lakah hian IPC, Criminal Law Amendment Act, leh Arms Act. hnuaia section hrang hrang hmangin FIR thehluh a ni. Dubey hi July 9 khan police ten an kap hlum a, an kahhlum chhan hi police motor-a Ujjain aṭanga Kanpur panpui a nih laiin a chuanna motor hi a let a, police silai a phawi sak hman a, tlanchhuah a tum laiin police-te chuan an kap hlum tih an sawi. 

July 2 zan khan Dubey man tura kal police pariatte hi Dubey leh a ho te chuan an kap hlum a ni. Heng thilsual titu chhuina kawngah police-te chuan theihtawp an chhuah mek a, chutih rualin police-in Dubey an kahhlum dan erawh sawisel leh rinhlelh a hlawh hle.