Bawng humhalh chhuanlama pawikhawhtu hum lo turin hriattir
Supreme Court chuan sorkar laipui leh state sorkarte hnenah bawng humhalh chhuanlama pawikhawina thlentute chu hum lo turin a hrilh.
Justice Dipak Misra kaihhruai bench hnenah sorkar laipui chuan dan leh thupek kenkawh chungchang chu state subjet a nih thu leh, bawng humhalh chhuanlama pawikhawihna thleng ṭhin a thlawp loh thu a hrilh a ni.
Solicitor General Ranjit Kumar chuan dan leh thupek kenkawh chu state mawhphurhna a ni a, sorkar laipui chuan inrawlhna a nei lo tih a sawi. Mahse sorkar laipui chuan hetianga pawikhawina thlentute chu a thlawp ngai lo a, heng mite tan hian India ramah hmun a awm lo a ni, a ti.
Supreme Court chuan April 7 khan state parukte chu bawng humhalh chhuanlama pawikhawihna thlentute leh, Dalit leh hnam hnuaihnungte kutthlak an nih chungchanga action an lak dan sawifiah turin a lo ti tawh bawk a ni.
Bawng humhalhtu pawlten ramchhunga pawikhawihna an thlen ṭhin chungchangah hian Supreme Court-ah petition thehluh a ni a, heng pawlte hian hnam hnuaihnung leh tlem zawkte chungah hlauhna an tuh sak niin an sawi.
Rashtriya Swayamsevak Sangh (RSS) chuan bawng humhalh chhuanlama hmanga tharum thawhna leh pawikhawihna thleng ṭhin chu a dem thu leh, a thlawp loh thu a sawi. RSS hruaitu Pramukh Manmohan Vaidya he thil hi eptuten political issue-a siam tumin an kaiher ṭhin tih a sawi a, hei hi ṭha a tih loh thu leh, khawtlang tan pawha thil pawi tak a nih thu a sawi.