Congress party-in Shankersinh Vaghela hnawtchhuak
Congress party chuan an party hruaitu hlun Shankersinh Vaghela chu Ningani khan party aṭangin an hnawtchhuak.
Gujarat chief minister hlui Vaghela hian nimina a piancham vawi 77-na lawmna, Gandhinagar-a neihnaah party aṭanga hnawhchhuah a nih thu hi a sawi. Congress aṭanga hnawhchhuah a nih thu a sawi rual hian Vaghela hian Rashtriya Swayamsevak Sangh (RSS) fakna thu a sawichhuak zui a ni. Kum 2017 state assembly inthlan dawnah khan a duh anga a campaign phalsak a nih loh vangin Vaghela hi Congress party chhungah hian a lungawi lo hle nia sawi a lo ni tawh a, party a sawisel fo a ni.
Vaghela chuan Congress party aṭanga hnawhchhuah ni mah se, party a chhuahsan dawn leh dawn loh a la sawi lo a, politics erawh chawlhsan mai a tum lo tih a sawi. Hetih lai hian BJP a zawm dawn nia sawi thawm pawh a awm bawk.