SIT-in 1984 riot case titawp dawn
Special Investigation Team (SIT) chuan kum 1984-a Sikh hnam beih an nih chungchang thubuai chu tihtawp a tum.
Kum1984-a central Delhi-a mipui thinrimin Sikh mi pahnih an tihhlum chungchang chu Ministry of Home Affairs-in thupek a tihchhuah hnuah, kum 2015 khan SIT hian a chhui ṭha leh a ni. Mahse he thil thlenga mawhphurtua puhte an puhna hi finfiahna engmah hmuh tur a awm loh avangin thubuai chhui mek hi tihtawp a tum ta tih, Metropolitan Magistrate Abhilash Malhotra hnenah an hriattir a ni.
SIT-in a thubuai chhui mek tihtawp a tum thu hi Sikh pahnih tihhlum tak chhungte hnenah pawh hriattir a ni. Court hnena report, phek 16-a chhah an thehluhah police-te chuan mimal an puhna finfiahna tur thil hi hmuh tur a awm lo tih a sawi a ni.
Prime Minister Indira Gandhi kahhlum a nih hnu, kum 1984, November 1 khan central Delhi-a ISBT taxi stand bulah mipui thinrim pungkhawm chuan tiang leh lung nen Sikh mite an bei a, mi pahnih chu na takin an hliam a, damdawi-in panpui ni mah se kawng lakah an thi a ni. Mipui pungkhawmte hian motor 15-20 vel an hal bawk.