Shiv Sena party symbol chungchangah order tichhuak rih lo turin EC hrilh

Supreme Court chuan nimin khan Election Commission of India (ECI) hnenah Maharashtra-a Shiv Sena party-a pawl pahnih, chief minister Eknath Shinde lamṭang leh Shiv Sena chief Uddhav Thackeray lamṭangten party symbol an inchuh chungchangah order tichhuak lo turin a hrilh.

Shiv Sena-a pawl pahnihten party symbol changtu zawk nih an inchuh chungchangh chu constitution bench ngaihtuah tir turin Supreme Court chuan a ti a, hei vang hian Ningani hma chuan lo buaipui rih lo turin ECI chu a hrilh a ni.

Ningani hian member panga awmna, constitution bench chuan symbol inchuh chungchang hi a ngaihtuah ang.

Eknath Shinde ṭamtangte hi Uddhav Thackeray kaihhruai lak aṭanga helin an inlahrang a, mahse MLA an ngah zawk avangin Shiv Sena party ziding zawk niin an inchhal a ni. Hetih lai hian Thackeray-a lam hian Supreme Court-ah Eknath Shinde lamṭang MLA-te disqualify tura ngenna an lo thehlut ve bawk.

Shinde chuan Supreme Court-ah Thackeray-a team te ngenna thehluhte chu hnawlsak turin a ngen a, Shiv Sena ziding chu Election Commission thlan tir turin a ti bawk. MLA an ngah zawk a, hei vang hian democracy kalphung ang takin a tam zawkin a thlawp chu a zidingah pawm tur leh, party chhung buainaah court inrawlh lo turin a ti a ni.

Shiv Sena MLA 55 zingah Shinde lamṭang hi 39 an awm a, Uddhav Thackeray kaihhruai Maha Vikas Aghadi (MVA) ṭangrual sorkar laka an hel avangin June thla khan sorkar hi a tlak phah a ni. Hemi hnu hian Shinde lamṭangte leh BJP thawkdun chuan sorkar thar dinin, chief minister-ah Shinde dah a ni a, deputy chief minister-ah BJP hruaitu Devendra Fadnavis a awm zui bawk.