Shanghai Grouping Meet-a tel turin Defence Minister a zin

Defence minister Rajnath Singh chu Shanghai Cooperation Organisation (SCO) defence ministerial conclave hmang turin nimin khan Uzbekistan khawpui, Tashkent-ah a zin a, ni thum a cham ang.

SCO Meet-ah hian China defence minister Wei Fenghe leh Russia defence minister Sergei Shoigu-te pawh an tel dawn a ni. SCO annual summit hi September 15-16 hian Sarmakand-ah neih a ni dawn bawk a ni.

Rajnath Singh chuan Tashkent-a a cham chhung hian Uzbekistan defence minister Lt.General Nizamovich chu meeting a neihpui dawn a, India mi awmte nen inkawmna hun an hmang dawn bawk tih a sawi. SCO member ram dang defence minister-te pawh meeting a neihpui bawk ang.

SCO meeting-ah hian regional security chungchang sawiho a ni dawn a, Ukraine leh Afghanistan dinhmun tawn mekte pawh an sawi bawk ang. SCO hi economic leh security blok thiltithei tak a ni chho mek a, khawvela transregional international organisation lian ber zingah a tel a ni.

Kum 2001-a Shanghai-a summit neih ṭumin Russia, China, Kyrgyz Republic, Kazakhstan, Tajikistan leh Uzbekistan president-te chuan SCO hi an din a, kum 2017 khan India leh Pakistan chu permanent member an ni zui ve bawk.