BJP-in Prophet Muhammad sawichhetu party MLA suspend

Bharatiya Janata Party (BJP) chuan prophet Muhammad a sawichhiat avanga man, Telangana BJP MLA T Raja Singh chu nimin khan an party aṭangin an supsend.

Nimin khan BJP chuan MLA Singh hnenah hian notice pein, ni 10 chhunga insawifiah turin a hriattir.

Singh-a'n Islam leh Muslim-te chungchang mawi lo taka a sawina video clip hi social media-ah a darh nasa hle a, a thusawi avang hian Thawhṭanni khan Hyderabad hmun hrang hrangah lungawi lohna lantir a ni. MLA lakah hian FIR thehluh a ni bawk. Singh hi Indian Penal Code (IPC)-a section hrang hrang hnuaiah Dabeerpura police station-ah thubuai siamsak zui a ni.

Hetih lai hian Singh chuan video darh chu sakhua inbeihna lam ni loin, comedian Munawar Faruqui a kahna fiamthu video niin a sawi thung. Tu rilru mah a tihnat loh thu leh, video darh hi part 1 chauh niin, a chhuah hunah part 2 a tihchhuah leh tur thu a sawi.

All India Majlis-e-Itehadul Muslimeen (AIMIM) hotu Asaduddin Owasi chuan Raja Singh thusawi dan chu a dem thu sawiin, "BJP hian Prophet Muhammad leh Muslim hi an hua a ni," a ti. Hemi chungchanga prime minister Narendra Modi a ngawi reng chu a dem thu sawiin, ṭawngchhuak turin a phut bawk.

Bahujan Samaj Party (BSP) hotu Mayawati chuan BJP MLA thusawi dan chu a mualphothlak hle a ni tiin, ram mipuite inkara inremna leh boruak muanawm siam chu BJP hruaitu chuan a mawhphurhna a ni tih a hre lo em ni, tiin a zawt. "NupurSharma thusawi avangin ram chhungah boruak sosang tak a daih fel hmain BJP hruaitu dang, Telangana BJP MLA chuan pawi a rawn sawi zui leh nghal a, a mualphothlakin a demawm takzat a ni," a ti.