GJM-te’n Maoist chhawr an tum

Gorkhaland state hran phuta nawrh huaihawt mek, Gorkha Janamukti Morch (GJM)-te chuan an thil phut nawrna atan underground armed movement kalpui an tum a, hemi atan hian ṭhenawm rama Maoist hel hnenaṭangin traning lak an tum niin, West Bengal sorkar official-te chuan an sawi.

ADG (Law and order) Anuj Sharma chuan intellingence agency aṭanginṭhenawm rama Maoist-te chu GJM hian an chhawr tih thu an dawng niin a sawi a, sorkar hmun pawimawhte an bitum rin a nih thu leh, hemi chungchang hi police leh administrative official-te pawh hrilhhriat an nih thu a sawi.

Hetih lai hian GJM hruaitu chuan official-te puhna chu thu dik lo leh, belhchian dawl lo a nih thu a sawi. GJM general secretary Roshan Giri chuan an mahni tihbuai nan leh, an hmalakna tibahlah nan heng thilte hi official-te chuan an sawi niin a puh.

Sorkar senor official chuan GJM hian an mi leh sate training pe turin Maoist 25-30 vel an chhawr mek a, silai leh a mu pawh tam tham tak an nei a ni, a ti. GJM hian kum eng emaw zat kalta aṭanga silaite hi an lo chhekkhawl niin a sawi bawk.

GJM hian state hran phutin ni 38 zet nawrh an huaihawt tawh a, nawrh huaihawt chhung hian police station leh outpost-te beih a ni a, heng hmunaṭang hian silai leh silai mute lakchhuah a ni. Hetianga chet hi Maoist ho kalphung a nih thu official-te chuan an sawi.

Intelligence lama aṭanga thu an dawn hnuah, state sorkar chuan IPS officer eng emaw zat, Maoist beih letna kawnga tawnhriat nei ṭhate chu a tir nghal a ni. Counter insurgency force-a mid-level officer eng emaw zat chu Darjee­ling lamah tirh an ni bawk.